Babiri bishwe na Coronavirus mu Rwanda, 153 biganjemo abagororwa barayandura

Umubare w’abamaze guhitanwa na Coronavirus mu Rwanda wageze kuri 74 nyuma y’uko abantu babiri bishwe n’iki cyorezo kuri iki Cyumweru.

Minisiteri y’Ubuzima yihanganishije imiryango y’abagabo babiri barimo uw’imyaka 96 n’uwa 61 bitabye Imana mu Mujyi wa Kigali.

Icyorezo cya COVID-19 giterwa n’agakoko ka Coronavirus, gikunze kwibasira abantu basanganywe indwara za karande, abageze mu zabukuru n’abatitaweho hakiri kare.

Ni ubwa mbere mu Rwanda, Coronavirus yahitanye umuntu ukuze kuva iki cyorezo kibonetse mu gihugu muri Werurwe 2020.

Imibare y’abantu bahitanwa na COVID-19 iri kuzamuka mu gihe n’abandura na bo bakomeje kwiyongera umunsi ku wundi.

Minisante yatangaje ko kuri uyu wa 27 Ukuboza 2020, abantu 153 banduye Coronavirus mu bipimo 2502 byafashwe, umubare uri hejuru cyane muri iki gihe ubwandu bukomeje kwiyongera ndetse bwongeye no kuboneka muri gereza.

Itangazo ryerekana ko abarwayi bashya bakuwe muri “Kigali: 39, Huye: 103 (bapimwe muri gereza ya Huye), Musanze: 4, Kayonza: 2, Rubavu: 2, Gicumbi: 1, Burera: 1, Nyagatare: 1.’’

Minisiteri y’Ubuzima yerekana ko kuva umurwayi wa mbere wa COVID-19 agaragaye mu Rwanda ku wa 14 Werurwe 2020, abantu 7970 bamaze kwandura mu bipimo 716 933, abagera kuri 6289 barakize. Kuri ubu abakirwaye ni 1607 mu gihe abitabye Imana ari 74.

Coronavirus ni indwara itarabonerwa umuti ndetse mu kwita ku wayanduye havurwa ibimenyetso byayo birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwirinda imihuro itari ngombwa no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.

Leave a Reply

Your email address will not be published. Required fields are marked *