Burundi: biravugwa ko perezida Nkurunziza arembye akekwaho coronavirus

Amakuru aturuka mu Burundi akomeje kuvuga ko Perezida urimo gusoza manda, Pierre Nkurunziza yaba arembye, aho arwariye mu bitaro bya Karusi bizwi nka Hôpital du cinquantenaire.

Ni amakuru ataremezwa n’inzego bireba, ko ku Cyumweru aribwo Nkurunziza yajyanwe mu bitaro, ubu bikaba bicungiwe umutekano ku rwego rukomeye. Bikekwa ko na we ashobora kuba yaranduye Coronavirus.

Umuvugizi w’Ibiro bya Perezida Nkurunziza, Jean Claude Karerwa, mu kiganiro na BBC ntiyahakanye ko Nkurunziza arwaye cyangwa ngo abyemeze, avuga ko ari kujya i Karusi, ko nyuma aza kugira icyo atangaza.

Uburwayi bwa Perezida Nkurunziza butangajwe mu gihe ku wa 28 Gicurasi umugore we Denise Nkurunziza yajyanwe igitaraganya mu bitaro byo muri Kenya, ubwo yari amaze kuremba kubera icyorezo cya Coronavirus.

Mu Burundi hakomeje kugaragara abanduye iyo ndwara, ariko ubuyobozi bwahisemo kuyifata nk’indwara isanzwe, ku buryo badakozwa inamba zo kuyirinda nko kwambara udupfukamunwa no kwirinda ibikorwa bihuza abantu benshi.

Ubu burwayi butangajwe nyuma y’uko ku wa Gatandatu, Perezida Nkurunziza yagaragaye kuri stade Urukundo iri ahitwa i Buye mu ntara ya Ngozi, ahaberaga imikino ya nyuma y’igikombe cyitiriwe perezida, muri Volleyball.

Ni nyuma kandi y’ibiterane byari bimaze iminsi byo gushimira Imana, nyuma y’uko umukandida w’ishyaka CNDD FDD, Gen Maj Evariste Ndayishimiye, aherutse gutorerwa kuyobora u Burundi muri manda y’imyaka irindwi, mu matora yabaye ku wa 20 Gicurasi.

Leave a Reply

Your email address will not be published. Required fields are marked *