Mu karere ka Gakenke batatu batawe muri yombi bakekwaho kwaka ruswa abaturage kugira imfashanyo yibyo kurya

Kurukuta rwa twitter urwego rw’Ubugenzacyaha rwatangaje ko rwataye muri yombi umukuru w’Umudugudu, ushinzwe umutekano na Mutwarasibo bo mu Murenge wa Nemba mu Karere ka Gakenke, bakekwaho kwaka ruswa abaturage kugira ngo bahabwe ibiribwa bigenewe abagizweho ingaruka no kuguma mu rugo mu kwirinda Coronavirus.

Nyuma yo gufunga ibikorwa bitandukanye mu gukumira ikwirakwira rya Coronavirus, Guverinoma yemeje ko abakeneye inkunga baryaga ari uko bakoze, bazagenerwa ibiribwa bigatangwa binyuze mu buyobozi bw’inzego z’ibanze.

RIB yakomeje iti “Aba bayobozi babeshyaga abaturage ko hari indege yazanye ibiribwa ariko bisaba gutanga amafaranga kugirango bashyirwe ku rutonde rw’abagenerwa ibiribwa. Ubu bafungiwe kuri sitasiyo ya RIB ya Gakenke mu gihe iperereza rikomeje kugirango hakorwe dosiye ishyikirizwe Ubushinjacyaha.”

RIB irakangurira abaturage gukomeza gutanga amakuru ku banyereza ibyo kurya leta yageneye abagizweho ingaruka no kuguma mu rugo kubera kwirinda icyorezo cya Coronavirus, cyangwa bababeshya bagamije kubambura.

Kugeza ubu abamaze kwandura Coronavirus mu Rwanda ni 104, barimo bane bamaze gukira iyi ndwara bagasezererwa mu bitaro.

Leave a Reply

Your email address will not be published. Required fields are marked *