Ngoma: Umusore wavugwagaho guterana ibyuma n’umukobwa bapfa imibonano mpuzabitsina yapfuye

Umusore w’imyaka 22 wo mu Murenge wa Kibungo mu Karere ka Ngoma yitabye Imana nyuma yo kujyanwa kwa muganga we n’umukobwa w’imyaka 24 wigaga muri IPRC Ngoma nyuma yo gukomeretsanya bapfa imibonano mpuzabitsina.

Ibi bibaye nyuma y’aho kuri uyu wa Mbere tariki ya 14 ahagana saa saba z’amanywa uyu musore yagiye gusura umukobwa wiga mu ishuri rya IPRC Ngoma bakirirwana bagateka bakarya.

Bivugwa ko nyuma uyu musore yashatse ko bakora imibonano mpuzabitsina umukobwa akamwangira bikagera aho baterana ibyuma, umukobwa yakomeretse ku ijosi naho umusore akomereka mu nda aho impyiko zari zamusohotsemo.

Umuvugizi w’Umusigire wa RIB, Dr Murangira B. Thierry, yabwiye IGIHE ko uwo musore koko yamaze kwitaba Imana mu bitaro bya Ngoma, iperereza ngo rizakomeza hanyuma ibizarivamo bitangazwe.

Ubwo uyu musore n’umukobwa bajyanwaga kwa muganga, Umunyamabanga Nshingwabikorwa w’Umurenge wa Kibungo, Kanzayire Consolé, yari yabwiye IGIHE ko ibyabaye byose byatewe n’uko umwe atashakaga gukorana imibonano mpuzabitsina n’undi.

Ati “ Bari basanzwe bafitanye ubucuti bukomeye rero umukobwa yanze kuryamana n’umusore ngo umusore yahise afata icyuma agitera umukobwa mu nda no ku ijosi nawe agira ubwoba akitera mu nda.”

Gitifu Kanzayire yakomeje avuga ko abaturanyi bahise babimenyesha ubuyobozi bushaka imbangukiragutabara bajyanwa ku bitaro kugira ngo bakurikiranwe n’abaganga.

Leave a Reply

Your email address will not be published. Required fields are marked *