Ubushakashatsi bwagaragaje ko COVID-19 igera mu ntera ya metero 4 hagati y’abantu.

Ubushakashatsi bushya bwakorewe ku barwayi ba Coronavirus, bwagaragaje ko iyi virus ishobora kugera muri metero enye hagati y’abantu babiri, aho kuba ebyiri nk’uko byari bizwi.

Inkuru dukesha igihe.com igira iti:Iby’ibanze byavuye mu igenzura ryakozwe n’abashakashatsi b’Abashinwa byashyizwe ahagaragara ku wa Gatanu tariki ya 10 Mata, mu kinyamakuru cy’ikigo cya Leta Zunze Ubumwe za Amerika gishinzwe kurwanya indwara (CDC).

Abashakashatsi bayobowe n’ikipe yo mu ishuri ry’Ubuvuzi rya Gisikarikare ry’i Bejing, bapimye ubuso n’aho umwuka urimo virus ugera, ku barwayi bo mu bitaro bya Coronavirus bya Huoshenshan byo mu Mujyi wa Wuhan.

Mu byumba by’abarwayi 24 bakoreweho ubushakashatsi hagati ya tariki ya 19 Gashyantare n’iya 2 Werurwe, basanze virus y’iyi ndwara iba yiganje hasi mu cyumba cy’abarwayi, aho bemeza ko bishobora kuba biterwa n’uburemere bwayo butayemerera gutembera mu mwuka, bigatuma igwa hasi.

Ikindi kintu cyasanzweho virus ku kigero cyo hejuru ni kuri ’souris’ zikoreshwa mu kuyobora za mudasobwa, udutebo tujugunywamo imyanda, igice cyo ku musego w’igitanda no ku ngufuri z’inzugi.

Abashakashatsi bavuze ko kandi inkweto z’abaganga zishobora kugira uruhare mu gutwara iyi virusi.

Iyi kipe yagaragaje ko kandi iyi ndwara yandurira mu mwuka cyane, aho virus yayo ishobora kumara amasaha menshi itembera, bitandukanye no kuba yagwa hasi mu gihe cyo gukorora cyangwa kwitsamura, mu masegonda.

Babonye ko kandi tumwe mu duce tugize iyi virus dutaruka tukagera muri metero enye mu gihe hari utundi tuguma muri metero 2.4.

Ubushakashatsi busoza buvuga ko hashingiwe ku byagaragaye, “atari byiza kwishyira mu kato mu rugo ku muntu ukekwaho Coronavirus bitewe n’uburyo iyi ndwara ishobora gukwirakwiramo ahantu hatandukanye.”

Inzego zishinzwe ubuzima muri Leta Zunze Ubumwe za Amerika, zasabye abaturage bose kwambara udupfukamunwa mu gihe bari hanze kuko ishobora kwandurira mu guhumeka cyangwa kuvugana.

Source: Igihe.com

About NIYISENGWA Gilbert

A professional writer of Isiyose.rw

View all posts by NIYISENGWA Gilbert →

Leave a Reply

Your email address will not be published. Required fields are marked *